Thursday, March 26, 2009

Buli tahan bah!

Buli tahan bah! Lagu-lagu urang-urang Dusun toi Kadazan. Banyak bah lagu-lagu Dusun/Kadazan yang menarik hati dan memang siokkkkkk.....betul didengar sehingga terbuai-buai itu pikiran. Bah, kita urang sukung-sukunglah bah lagu-lagu tulun tokou. Beli gia itu Kaset/CD diurang. Dan beli noh yang original kio. Jangan beli yang cetak rompak punya. Jangan kasi untung itu penjual kaset rompak. Jangan beli dari mereka. Biarlah diurang bingkarap dan rugi! Adakah gia urang panat-panat mencipta lagu, berlatih, keluar duit bikin kasit/CD, diaurang(pencuri!) senang-senang curi titik peluh urang. Lagu-lagu tuu hak diurang yang buat. Para pencetak rompak tidak berhak sama sekali memperbanyak, mengedar dan menjual lagu-lagu berkenaan.
Kalau mereka mau berbisnes, mintalah keizinan dan bayarlah tuan punya lagu-lagu dan penyanyinya. Jangan mau untung sendiri saja! Perbuatan diurang ini salah, dan betul-betul tidak adil. Bikin sakit hati lagi tuu. Orang panat-panat berusaha! Diurang sanang-sanang cetak rompak hasil orang lain. Kalau mau buat bisnes buatlah bah bagus-bagus! Supaya sama-sama untung, sama-sama juga senang hati. Dan jadi kawan lagi tu! Bah, jangan kasi susah orang mah, dan jangan cari atau buat musuh.
Ok! Janganlah kita membeli kaset/ CD cetak rompak punya. Kalau kita beli, kita secara langsung atau tidak langsung menggalakkan hal yang tak baik dan tak beretika ini berleluasan. Jadi, marilah kita ramai-ramai sukung penerbit, pencipta dan penyanyi yang bertungkus-lumus menghasilkan lagu-lagu tempatan dengan tidak membeli kaset/CD yang dicetak rompak.
Akhir sekali, cuba gia kamurang klik Link dibawah ini. Saya rasakan, inilah antara lagu-lagu Dusun/Kadazan yang bagi saya betul-betul siokkkkkk bah! (Tapi memang banyk lagi yang lain bah! )Dan para penyanyinya pun....alawa, awantang om olumis nogi! Buli tahan bah urang kita! Olumis kapio loyou diolo om awasi doh kinongohon. Umbalai gia...

+John Gaisah, "Miniaga Oh Sinsing" http://www.youtube.com/watch?v=9nEODzpySpo

+Felix Bin Agus, "Pitongkiadan" http://www.youtube.com/watch?v=7ZJMi8DpT9U


+Clare Petrus Edin, "Id TompiumananKU" http://www.youtube.com/watch?v=VdS4qkDdP8A

+Clare Petrus Edwin, "Kandaman Piginavaan" http://www.youtube.com/watch?v=bp09O3zsO5o

+Clarice John Marta, "Adaa" - http://www.youtube.com/watch?v=649uQtdoD3E